الدهنيات الصحية و الدهنيات الغير الصحية

تحية للأبطال

اولا للي خاص نعرفو ان الدهون وبصفة عامة هي عنصر مهم فتركيب خلايا أجسامنا ومهمة بزاف للجسم حيث كتحميه، كتعطيه الطاقة وعندها دور كبير في نقل مجموعة من الفيتامينات.

هاد الدهون بطبيعة الحال فيها للي مفيد للجسم وفيها للمضر له. وهدفنا في هاد الموضوع هو نبينو لكم الفرق ،حيث أغلبية الاخوان للي كايبداو فالحمية كايقطعو جميع مصادر الدهون وكايصدقو خارجين على صحتهم.

المهم!!

وانت كتشري شي منتج من منتجات الوجبات السريعة/الخفيفة او الصحية غادي تلقا فداك الجدول فالخلف نسبة الدهون المشبعة ونسبة الدهون المهدرجة او الدهون الغير مشبعة.

وتعريفهم هو كالتالي:

-الدهون المشبعة (saturated fat): كلما تزاد استهلاكك لها كلما تزادت نسبة الكولسترول الضار فالدم، وبالتالي ضرر كبير على القلب ومصدرها الحليب كامل الدسم واللحوم بالاضافة لزيت النخيل للي داخل فمكونات السناكس بحال سنيكرز وبوونتي...

-الدهون المهدرجة (Trans fats): هاد النوعية هي الاخطر حيث ماشي غير كتزيد نسبة الكولسترول الضار ولكن كتنقص حتى من الكولسترول النافع، هاد النوعية ديال الدهون وللي هي أصلا مصنعة وكاتكون داخلة فالصناعات الغدائية بحال السناكس ،الحلويات والمملحات...

وهاد الجوج اعلاه 👆🏼 داخلين فخانة الدهون للي ماشي صحية.

-الدهون الغير مشبعة (unsaturated fat):
أشهر مصادرها زيت الزيتون، الافوكا،الزريعة الكحلة ،الذرة،اللوز ،الكركاع وگاع المكسرات والفوائد ديالها انها كاتقلل من الكوليسترول الضار وكتزيد من الكولسترول المفيد.يعني قلب صحيح وسليم .

وكاينة تاني دهون زيت السمك omega 3 الرابط التالي فيه موضوع بالتفصيل:

https://moroccanspartiate.blogspot.com/2017/11/blog-post_13.html

*اضافة بسيطة : في حالت انك ماكتمارسش الرياضة فراه جسمك كايحتاج ستة اسابيع باش يتخلص من الدهون الغير صحية وللي مخزنها الجسم ديالك بينما كايحتاج غير جوج صيمانات فحالة تناول مصادر غنية بالدهنيات الصحية.

بطبيعة الحال ماكنتكلمش على دوك الفضائيين من فصيلة "الاكتومورف" للي اجسامهم كاطحن كلشي فنهارو!😂😂

فالأخير ماتنساش طاگي وتشارك الموضوع مع صحابك حتى تعم الفائدة.